ठोरीबासीहरुको तीब्र विरोधपछि दशगजामा सुरक्षापोष्ट बनाउन आएका भारतीय सुरक्षा फौज पछि हट्यो

ठोरीबासीहरुको तीब्र विरोधपछि दशगजामा सुरक्षापोष्ट बनाउन आएका भारतीय सुरक्षा फौज पछि हट्यो

पर्सा ( ठोरी ) ७ जेठ । पर्सास्थित ठोरीका बासिन्दाको तीब्र विरोध र अडानपछि भारतीय पक्षले दशगजा क्षेत्रमा बनाउन लागेको सुरक्षा पोस्ट सीमाबाट करिब ३० मिटर पर सारेको छ । भारतीय पक्षले वन गस्तीका लागि भन्दै सोमबारदेखि ठोरी गाउँपालिका–४ विजयबस्तीस्थित दशगजामै टावरसहितको सुरक्षा पोस्ट बनाउन थालेको थियो । अचानक गिट्टी, बालुवा झारेर निर्माण कार्यसमेत थालेको भारतीय पक्षलाई स्थानीयले रोकेका थिए ।

मंगलबार फेरि दशगजामै सुरक्षा पोस्ट बनाउन भारतीय सुरक्षा फौज एसएसबी, बिहार प्रहरी र भारतीय वन विभागका अधिकारी आएका थिए । करिब २ सय ५० को संख्यामा भेला भएका स्थानीय, नेपाल तथा सशस्त्र प्रहरीसमेतको संयुक्त विरोध र अडानपछि भारतीय पक्ष आफ्नै भूमिमा सुरक्षा पोस्ट निर्माण गर्न सहमत भएको हो । ठोरी–४ का वडाध्यक्ष बहीबहादुर पाख्रिनले ठोरीवासी र जनप्रतिनिधिको अडानले भारतीय पक्ष पछि हटेको बताए । ‘कुनै पनि हालतमा दशगजामा सुरक्षा पोस्ट बनाउन दिन्नौं भनेर हामीले अडान लियौं,’ उनले भने । पटकपटक भारतीय पक्षले नेपाली भूमि अतिक्रमण गर्न खोज्दा यहाँका स्थानीयले चर्को विरोध गर्दै आएका छन् ।



ट्रेन्डिङ